നിത്യകാമുകി

എന്നും കാമുകിയായിരിക്കാനാണ് എനിക്കിഷ്ടം.
അമ്മയല്ല.
ഭാര്യയോ പെങ്ങളോ അല്ല.
ഒരിക്കലും അമ്മയാകരുത്.
സദാ നിറഞ്ഞിരിക്കുന്ന പൂന്തേന്‍.
മാന്തളിര്‍ തിന്നു മദിക്കുന്ന കുയിലാണ് എന്നിലെ കാമുകി.
ആഹാരം,വസ്ത്രം,പാര്‍പ്പിടം എന്നപോലെ
ഒരു സ്ത്രീക്ക് ഭര്‍ത്താവും കാമുകനും അത്യാവശ്യമാണ്.
അതവളുടെ പ്രാഥമിക അവകാശം കൂടിയാണ്.
അഭയമേകുന്നവന് ശരീരഭാഷ അറിയണമെന്നില്ല.
എന്നിലെ സ്ത്രീയുടെ സ്വത്വം നിലനിര്‍ത്തുന്നതിന്,
ഈ പെണ്‍ജന്മത്തിന്റെ പൂര്‍ണതയ്ക്ക്
ഒരു കാമുകന്‍ കൂടിയേ കഴിയൂ.
കാമുകനില്ലാത്ത ഭാര്യയുടെ ജീവിതം
പച്ചക്കൊള്ളി വെച്ച അടുപ്പു മാത്രമാണ്.
പുരുഷന് ഒരു സ്ത്രീയില്‍ ഒതുങ്ങാന്‍ കഴിയാത്തതുപോലെതന്നെ
ചിലപ്പോള്‍ സ്ത്രീക്ക് പല പുരുഷരിലും അടങ്ങാന്‍ കഴിഞ്ഞെന്നു വരില്ല.
പ്രകൃതിയോടിണങ്ങി ജീവിക്കുന്നവര്‍ക്ക്
ഒരിണയില്‍ ഒതുങ്ങാനാവില്ല,
-മനസ്സുകൊണ്ടെങ്കിലും.